[This article is the editorial of the first issue of the journal Novialiste, May 1934, and is written in Novial, with the letter c and the pair sc reintroduced, both with the same (voiceless) sound as s. The editor of the journal was Per Ahlberg.]
"Vor ye duanti yares retro solim sistemes emerjad, tam diferanti fro mutu kam jorne e nokte, on nun komensa tu vida grandi konverganti linies, kel permise on tu percepte ti momente, kand li homaro ha a altri venkos de civilisatione junkte ti del auxiliari lingue, kel es rekognit e praktisat dal toti monde - da ti toti monde, kelen cirkuregardo non es limitat dal streti horisonte del patria."
Depos ti tempe kand profesore Jespersen enuntiad dis prediktione cirk quarimi sekle ha pasa. Ob li faktus ha verifika lon prediktione? Li tri tipes de lingue-sisteme keles salia ek li densi sistem-foreste, nomim li simplifikat latine, Esperanto-Ido e Occidental-Novial verifika konfirmanti respondo. Li konverganti linies inter li diversi formes de latinsimplifikatus, inter Esperanto e Ido, e inter Occidental e Novial es evidenti a omne.
Ma on devud darfa tu expekta plu grandi progreso del kosmopoliti lingual movemente durant dis tempe. Vor es serchendi li kause de dis quasi stagnatione movemental?
In li disparateso de intereses del interesati partises.
Den dises ha rivalira pri proselites, e chake ha eforta unlaterim tu demonstra ke li qualitates e koses del altri partises konkuranti es plu mal kam onen propris: Kun grandi talente e rutine on ha pikte li bak-lateres de mutun lingue-sisteme e taliman exita li nausee del publike.
Durantim lingual diktatores ha stabilisa li lingues e per tum hindrad lesen developatione.
Ma dis epoke de guerasi rivaliro inter diferanti sistem-grupes deve non permana perpetualim; den lum venena li atmosfere self del kosmopoliti lingue e repulse ti publike, kelen simpatie nus voli aquira, ti publike kel ja depos longitem ha bli kustoma tu qualifika nus kom ridindi, fanati sektanes. Ma - e tum es multim plu mal - per ti interluktachos nus vunda profundim li kosmopoliti lingual idee self.
E tamen. Omne kel pretense tu es justi mus rekogni ke grand e valorosi laboros es exekutet dal pionires de Esperanto, Ido, Latino sine flexione, Occidental e Novial. Esperanto ha pruva ke lingue-sisteme komposit per vordes kosmopoliti e privati es usabli in international trafike del pense; a Ido nus deba li introduktione del logike en li lingue kosmopoliti; li sinflexioni latines demonstra quum es faebli per simplifikatione del lingue de Cicero; in Occidental li naturalisme plea eminenti role, e Novial es sintese de kosmopoliti vordes organisat segun kosmopoliti lingue-leges, sisteme basisat sur sciential kritike e demokratim liberal diskusione. Chake ek dis lingues have sen special bon qualitate, e chake ek les ha kontribu positivim al progreso vers li standardisatione del kosmopoliti lingue.
E li propageres de dis e altri sistemes es honesti homes! Non es kompromitent tu rekogni disum publikim.
"Si Novial es li maxim bon interlingue, e me kreda ke lu es, lu dev resta super li luktachos, klamachos e emotionalismes del vulgari grupaches, e bli representa per digni, tranquili e intelektualim sereni komunikationes. Si lu faktim es li maxim bon, lu non besona tima li altris. Tu montra pavore es tu admise sentios de inferioritate. Tu moka altri sistemes es nur sadisti fanfarono kel mi-vela li selfduto del mokere."¹
In dis citatu es expreset li mente de Novialisten kontributione al komun laboro per justum e verum e bonvolio por li kosmopoliti standard-lingue.
Redaktione de NOVIALISTE.
¹ Ek letre fro fisiologe.
This page hosted by Yellow Internet.
James Chandler
15-Dec-97.