From the Annals of Progreso
Saluto de Dr. AUERBACH
[From Progreso tomo VIII nro. 81, januaro 1931.]
La milito raptis a ni ne nur nia neremplasebla duktero Louis Couturat, ma anke nia reprezentiva organo, la revuo Progreso. Anke pos la riestabliso dil komuna laboro internaciona Progreso ne riviveskis. Nun tandem, pos plu kam 16 yari, ni itere havas nia Progreso!. E ni ne nur ri-havas la revuo, ma ni anke ri-havas la spirito di progreso qua regnis en nia rangi dum la vivo di Couturat, e do la unesma numero dil nova serio di Progreso inauguras nova epoko en qua Ido itere pleos importanta e determinanta rolo en la mondolingual movado.
S. AUERBACH.